To viktige utdanningar snart i gong på Voss

Hausten er godt i gang, og denne månaden ønskjer HVK Studiesenter velkomen til både nye helseleiarstudentar og eit nytt studieår for barnehagelærarstudentane våre. Gjennom desentraliserte utdanningstilbod får fleire moglegheita til å kombinere jobb, familieliv og høgare utdanning, utan å måtte flytte frå regionen.

22 helseleiarar samlast på Voss

Måndag 7. september skal 22 studentar frå kommunane i regionen møttast til første samling i helseleiarutdanninga på Hagahaugen på Voss.

Dette er første gong utdanninga blir gjennomført på Voss, og første gong i regi av HVK Studiesenter og Voss herad. Studiet er retta mot mellomleiarar og avdelingsleiarar i helse- og omsorgssektoren som ønskjer å utvikle leiarkompetansen sin og stå endå sterkare i møte med framtidas utfordringar i helsesektoren.

Utdanninga blir tilbydd av Universitetet i Innlandet i samarbeid med Akademiet Vidareutdanning og Ambia, og består av emne på 7,5 studiepoeng. Studentane kan ta fleire emne og oppnå inntil 60 studiepoeng.

Vi er glade for å kunne tilby denne utdanninga lokalt og ønskjer alle studentane lykke til med studiestarten.

Barnehagelærarstudentane tek fatt på år to

Den 16. september startar studentane på den arbeidsplassbaserte barnehagelærarutdanninga (ABLU) sitt andre studieår. Totalt 28 studentar frå Hardanger, Voss og Kvinnherad er med på utdanninga, som gjer det mogleg å ta ein bachelorgrad samstundes som ein arbeider i barnehage.

Utdanninga kom i stand gjennom eit tett samarbeid mellom kommunane i regionen, HVK Studiesenter og Høgskulen på Vestlandet. Dette var første gong ei barnehagelærarutdanning vart desentralisert til regionen, og interessa har vore stor.

Gjennom studieåret blir samlingane gjennomførte både på Voss og i Odda. Utdanninga bidreg til å styrkje kompetansen i barnehagane våre og legg til rette for at fleire kan ta høgare utdanning utan å måtte reise bort frå lokalsamfunnet sitt.

Byggjer kompetanse der folk bur

Både helseleiarutdanninga og den arbeidsplassbaserte barnehagelærarutdanninga er gode døme på korleis samarbeid mellom utdanningsinstitusjonar, kommunar og arbeidsliv kan skape fleire moglegheiter lokalt.

Ved å tilby fleksible og desentraliserte utdanningar kan vi styrkje kompetansen i regionen og gjere det enklare for folk å utvikle seg fagleg gjennom heile arbeidslivet. Det er vi stolte av å vere med på.